عالمی بینک نے پنجاب اربن لینڈ سسٹمز انہانسمنٹ پراجیکٹ کے اہم اہداف میں توقعات سے بڑھ کر پیش رفت پر منصوبے کی ترقیاتی مقاصد اور عمل درآمد سے متعلق درجہ بندی تسلی بخش سے بڑھا کر انتہائی تسلی بخش کر دی ہے۔ پنجاب بورڈ آف ریونیو اور پنجاب لینڈ ریکارڈز اتھارٹی (PLRA) کے زیرِ انتظام منصوبے کے تحت 6 کروڑ 99 لاکھ 20 ہزار اراضی حقوق کو ڈیجیٹل لینڈ ریکارڈ سسٹم میں رجسٹر یا منسلک کیا جا چکا ہے۔ صوبے کے 86 فیصد رقبے کی ڈیجیٹل نقشہ بندی مکمل کر لی گئی ہے، جبکہ 3 کروڑ 11 لاکھ 80 ہزار افراد پر مبنی اراضی ریکارڈ کو زمین کے مخصوص قطعات کی بنیاد پر مرتب کر دیا گیا ہے۔
منصوبے کے تحت سرکاری اراضی کی نشاندہی اور رہائشی ترقیاتی منصوبوں کی منصوبہ بندی میں بھی پیش رفت ہوئی ہے۔ ہاؤسنگ منصوبوں کے لیے 933.5 ہیکٹر اراضی کی جانچ پڑتال کی گئی، جبکہ مختلف ترقیاتی پروگراموں کے لیے سرکاری زمین کے 200 مقامات کی نشاندہی کی گئی ہے۔ عالمی بینک کی رپورٹ کے مطابق پنجاب کے مجموعی طور پر 6 ہزار 14 ریونیو مواضعات میں سے 5 ہزار 805 کا ریکارڈ ڈیجیٹلائز کرکے نوٹیفائی کیا جا چکا ہے۔ اس عمل میں 2 کروڑ 44 لاکھ سے زائد اراضی مالکان کا ریکارڈ شامل ہے، جبکہ خواتین کے نام انفرادی یا مشترکہ طور پر 75 لاکھ 70 ہزار نئے یا اپ ڈیٹ شدہ اراضی ریکارڈ درج کیے گئے ہیں۔
اکتوبر 2026 تک منصوبے کی مجموعی عملی پیش رفت 90 فیصد تک پہنچ چکی تھی اور اسے مقررہ مدت 30 جون 2027 تک مکمل کرنے کا ہدف برقرار ہے۔ تاہم مالیاتی رقوم کے اجرا کی رفتار نسبتاً سست رہی اور نظرثانی شدہ 14 کروڑ 57 لاکھ 60 ہزار امریکی ڈالر کی فنانسنگ میں سے تقریباً 9 کروڑ 80 ہزار ڈالر جاری کیے گئے، جو مجموعی رقم کا 61.8 فیصد بنتے ہیں۔ عالمی بینک نے منصوبے کے مجموعی خطرات کی درجہ بندی درمیانے درجے پر برقرار رکھتے ہوئے اراضی کے انتظام، جائیدادوں کے ریکارڈ اور ترقیاتی منصوبہ بندی میں نمایاں بہتری کو تسلیم کیا ہے۔