عالمی ریئل اسٹیٹ خبریں

امریکا | ری نیوز انٹرنیشنل ڈیسک نیوز
امریکا کے رئیل اسٹیٹ شعبے میں ایک بڑے انضمام کا معاہدہ طے پا گیا ہے، جس کے تحت انڈیپنڈنس ریئلٹی ٹرسٹ اور سینٹر سپیس نے تقریباً 8.1 ارب ڈالر مالیت کے تمام شیئرز پر مشتمل انضمام پر اتفاق کیا ہے۔
وال سٹریٹ جرنل کے مطابق اس معاہدے کے نتیجے میں ایک بڑا اپارٹمنٹ رئیل اسٹیٹ انویسٹمنٹ ٹرسٹ وجود میں آئے گا، جس کی متوقع ایکویٹی مارکیٹ قدر تقریباً 5 ارب ڈالر ہوگی۔ اس انضمام سے دونوں کمپنیوں کے رئیل اسٹیٹ اثاثے ایک بڑے پلیٹ فارم کے تحت آ جائیں گے۔
یہ سودا امریکی رہائشی رئیل اسٹیٹ مارکیٹ میں بڑے ادارہ جاتی سرمایہ کاروں کے بڑھتے ہوئے حجم اور یکجا ہونے کے رجحان کی بھی عکاسی کرتا ہے۔ بڑے پیمانے پر انضمام کے ذریعے کمپنیاں اپنے اثاثوں، انتظامی صلاحیتوں اور سرمایہ کاری کے وسائل کو ایک پلیٹ فارم پر لا کر کاروباری حجم بڑھانے کی کوشش کرتی ہیں۔
تمام شیئرز پر مشتمل اس لین دین میں دونوں کمپنیوں کے شیئرز ہولڈر کو نئے مشترکہ ادارے میں حصہ ملے گا، جبکہ انضمام مکمل ہونے کے بعد نیا ادارہ امریکی اپارٹمنٹ مارکیٹ میں ایک نمایاں رئیل اسٹیٹ سرمایہ کاری ٹرسٹ کے طور پر سامنے آئے گا۔
دونوں کمپنیوں کو توقع ہے کہ یہ سودا 2026 کی چوتھی سہ ماہی کے اختتام تک مکمل ہو جائے گا، جس کے بعد مشترکہ ادارہ بڑے پیمانے پر رہائشی املاک کے انتظام اور سرمایہ کاری کا سلسلہ جاری رکھے گا۔

پراپرٹی کنسلٹنسی سی بی آر ای کے مطابق، ہانگ کانگ کی لگژری رہائشی مارکیٹ میں قیمتوں میں اصافہ ہوا اور انتہائی مہنگی جائیدادوں کے سودوں میں نمایاں اضافہ ہوا، جبکہ مین لینڈ چینی خریداروں کی طلب مارکیٹ کو سہارا دیتی رہی۔

2026 کے ابتدائی نو ماہ میں لگژری گھروں کی قیمتوں میں سال کے آغاز سے اب تک 5.3 فیصد اضافہ ہوا۔ قیمتیں مارچ 2025 میں ریکارڈ کی گئی کم ترین سطح سے 11.3 فیصد بلند رہیں۔ سی بی آر ای کے مطابق مارکیٹ میں زیادہ اتار چڑھاؤ اور شرحِ سود سے متعلق غیر یقینی صورتِ حال کے باوجود یہ شعبہ مستحکم رہا۔

انتہائی مہنگی جائیدادوں کے شعبے میں سرگرمی میں تیزی دیکھی گئی۔ جنوری سے ستمبر کے دوران 10 کروڑ ہانگ کانگ ڈالر سے زائد مالیت کی جائیدادوں کے 197 سودے ہوئے، جو گزشتہ سال کے اسی عرصے کے مقابلے میں 109.6 فیصد زیادہ ہیں۔ ان سودوں کی مجموعی مالیت 54.9 فیصد اضافے کے ساتھ 2820 کروڑ ہانگ کانگ ڈالر تک پہنچ گئی۔

تیسری سہ ماہی میں مین لینڈ چینی خریداروں نے پرائمری مارکیٹ میں لگژری رہائشی جائیدادوں کے 72 فیصد اور سیکنڈری مارکیٹ کے 68 فیصد سودوں میں حصہ لیا۔ سی بی آر ای کے مطابق، مین لینڈ چین سے مسلسل طلب اور اعلیٰ معیار کی رہائشی جائیدادوں کی محدود دستیابی مارکیٹ کو سہارا دے رہی ہے۔

سی بی آر ای ہانگ کانگ کے ایگزیکٹو ڈائریکٹر برائے ویلیوایشن اینڈ ایڈوائزری سروسز ایڈی کووک نے کہا کہ شرحِ سود سے متعلق غیر یقینی صورتِ حال اور سرمائے پر سخت کنٹرولز کے باوجود لگژری رہائشی مارکیٹ نے اپنی مضبوطی برقرار رکھی۔ ان کے مطابق بالخصوص مین لینڈ چین سے تعلق رکھنے والے صاحبِ ثروت خریدار انتہائی مہنگی جائیدادوں کے شعبے میں سرگرمی جاری رکھے ہوئے ہیں، جبکہ نئی جائیدادوں کی محدود فراہمی اہم مقامات پر قیمتوں کو سہارا دے رہی ہے۔

عالمی جغرافیائی سیاسی اور معاشی غیر یقینی صورتِ حال کے باوجود سعودی عرب کی رئیل سٹیٹ مارکیٹ سرمایہ کاروں کی توجہ حاصل کر رہی ہے۔ مضبوط مقامی طلب اور رہائشی مکانات کی فراہمی بڑھانے کی کوششیں اس شعبے کو سہارا دے رہی ہیں۔ وزارتِ بلدیات و ہاؤسنگ کے مطابق جنوری سے اکتوبر 2026 کے اختتام تک مملکت بھر میں ساکانی پلیٹ فارم کے ذریعے 15 ہزار سے زائد رہائشی پلاٹ فراہم کیے گئے، جبکہ نجی شعبے نے بھی نئے منصوبے شروع کیے ہیں۔
ڈویلپر ادارہ ارادہ نے مقامی کمپنی ایکسٹوپیا کے ساتھ شراکت داری کے ذریعے سعودی مارکیٹ میں قدم رکھا ہے۔ اس شراکت داری کو زمین اور ترقیاتی مواقع کے 50 ارب ریال (13.3 ارب ڈالر) مالیت کے پورٹ فولیو کی حمایت حاصل ہے۔ دونوں کمپنیوں کا پہلا منصوبہ ریاض کے علاقے الرمال میں 14 ارب ریال کی رہائشی ترقی ہے۔

دوسری جانب ریاض ریجن میونسپلٹی، وزارتِ بلدیات و ہاؤسنگ اور نیشنل سینٹر فار پرائیویٹائزیشن اینڈ پبلک پرائیویٹ پارٹنرشپ نے شمالی ریاض میں میونسپل اراضی کی مشترکہ سرمایہ کاری کے منصوبے کے لیے اظہارِ دلچسپی، پری کوالیفکیشن اور تجاویز جمع کرانے کے مراحل شروع کر دیے ہیں۔ نجی شعبے کے ساتھ 50 سالہ شراکت داری میونسپلٹی کا اس طرز کا پہلا منصوبہ ہے۔

اضافی زمین کی فراہمی سے درمیانی مدت میں قیمتوں کا دباؤ کم ہو سکتا ہے، بشرطیکہ پلاٹوں کا محلِ وقوع اور رقبہ حقیقی طلب کے مطابق ہو۔ اس سے ڈویلپرز، ٹھیکیداروں، انجینئرنگ کمپنیوں اور تعمیراتی سامان فراہم کرنے والوں کے لیے بھی کام کے مواقع پیدا ہو سکتے ہیں۔

رئیل اسٹیٹ ڈویلپر احمد عمر باسودان نے میڈیا سے گفتگو کرتے ہوئے کہا کہ صرف مکانات اور پلاٹوں کی تعداد بڑھانا مارکیٹ کے مسائل حل کرنے کے لیے کافی نہیں۔ ان کے مطابق رہائش خریداروں کی استطاعت کے مطابق ہونی چاہیے، اس کے ساتھ مناسب محلِ وقوع، بنیادی سہولیات اور انفراسٹرکچر کی دستیابی اور تعمیراتی لاگت پر قابو بھی ضروری ہے۔ انہوں نے کہا کہ نئی زمین اور نجی منصوبے بڑھتی آبادی اور شہری پھیلاؤ کے تناظر میں رسد اور طلب میں توازن قائم کرنے کی کوششوں کا حصہ ہیں۔