عالمی ریئل اسٹیٹ خبریں

دبئی | ری نیوز انٹرنیشنل ڈیسک نیوز
متحدہ عرب امارات کی رئیل اسٹیٹ مارکیٹ میں 2026 کی دوسری سہ ماہی کے دوران تیزی کی رفتار کم ہوئی ہے۔ Colliers کے مطابق دبئی میں گھروں کی قیمتیں اور کرایے کم ہوئے، جبکہ ابوظبی کی مارکیٹ میں بھی اعتدال اور شارجہ میں پراپرٹی کی قیمتوں میں کمی دیکھی گئی۔
دبئی میں اپارٹمنٹس اور ولاز کی اوسط قیمتیں سہ ماہی بنیاد پر 3 فیصد کم ہوئیں۔ اسی دوران اپارٹمنٹ کے کرایوں میں 4 فیصد جبکہ ولاز کے کرایوں میں 2 فیصد کمی ریکارڈ کی گئی۔
'کولیئرز' کے مطابق دبئی کی رہائشی مارکیٹ اب تیزی سے معمول کی طرف بڑھ رہی ہے۔ اگرچہ قیمتوں میں کمی ہوئی ہے، لیکن مارکیٹ کی مجموعی کارکردگی توقعات کے مقابلے میں زیادہ مضبوط رہی ہے۔
آف پلان پراپرٹی مارکیٹ میں صورتحال مختلف رہی، جہاں خریداروں کی دلچسپی برقرار رہی، تاہم طلب زیادہ منتخب نوعیت اختیار کر گئی ہے۔
دبئی میں نئی رہائشی سپلائی بھی جاری ہے۔ 2026 کی دوسری سہ ماہی میں تقریباً 11,650 رہائشی یونٹس مکمل ہوئے، جن میں 9,200 اپارٹمنٹس اور 2,450 ولاز شامل ہیں۔ مزید 56,600 یونٹس 2026 کے اختتام تک مکمل ہونے کی توقع ہے۔
دبئی میں میٹرو توسیع، سڑکوں کی اپ گریڈیشن، نئے انٹرچینجز، سرنگوں اور اتحاد ریل کے سٹیشنز سمیت بڑے انفراسٹرکچر منصوبوں پر بھی کام جاری ہے۔
دبئی کے کرایوں کی مارکیٹ میں بھی گزشتہ چند سال کی تیز رفتار ترقی کے بعد اعتدال آیا ہے۔ Colliers کے مطابق بڑھتے ہوئے کرایوں اور گھروں کی قیمتوں کے باعث affordability ایک اہم مسئلہ بن رہی ہے، جبکہ کچھ کرایہ دار اب کرائے کے بجائے گھر خریدنے کو ترجیح دے رہے ہیں۔ 2026 کی دوسری سہ ماہی میں لیزنگ ٹرانزیکشنز میں تقریباً ایک چوتھائی کمی ہوئی۔
کرایہ داروں کے لیے سہولت پیدا کرنے کے مقصد سے دبئی لینڈ ڈیپارٹمنٹ نے Flexi Rent اقدام شروع کیا ہے، جس کے تحت شریک مالک مکان ماہانہ، سہ ماہی یا ششماہی بنیاد پر کرایہ وصول کر سکتے ہیں۔
تاہم دبئی کی آفس مارکیٹ نے بہتر کارکردگی برقرار رکھی۔ آف پلان گریڈ A دفاتر کی مضبوط طلب نے مختلف علاقوں میں قیمتوں میں اضافے کو سہارا دیا۔
'کولئیرز' کے مطابق ابوظبی میں بھی قیمتوں اور کرایوں میں سہ ماہی بنیاد پر کمی دیکھی گئی، جبکہ شارجہ اور رأس الخیمہ میں اپارٹمنٹس کی قیمتوں میں نرمی آئی۔ مجموعی طور پر امارات کی رہائشی مارکیٹ غیر معمولی تیزی کے دور سے نکل کر زیادہ متوازن مرحلے میں داخل ہوتی دکھائی دے رہی ہے۔

امریکا کی ہاؤسنگ مارکیٹ کی پائیدار بحالی کا انحصار رہن قرضوں کی شرحِ سود میں کمی پر ہوگا۔ رئیل اسٹیٹ ایجنٹس کے ایک سروے کے مطابق بلند قرضہ جاتی اخراجات خریداروں اور فروخت کنندگان، دونوں کی سرگرمیوں کو متاثر کر رہے ہیں۔

رئیل ریمیکس گروپ کا ایجنٹ آپٹیمزم انڈیکس، جو صفر سے 100 کے پیمانے پر ایجنٹس کے آئندہ 12 ماہ کے بارے میں اعتماد کو جانچتا ہے، ستمبر میں کم ہو کر 45.8 رہ گیا، جبکہ اگست میں یہ 54.3 تھا۔ انڈیکس میں کمی سے ظاہر ہوتا ہے کہ ایجنٹس کو تشویش ہے کہ رہن قرضوں کی بلند شرحِ سود مزید خریداروں کو مارکیٹ میں آنے سے روکے گی۔

ادارے کے حالیہ ماہانہ سروے میں 177 ایجنٹس میں سے 65 فیصد نے کہا کہ خریداروں کی طلب میں نمایاں اضافے کے لیے 30 سالہ رہن قرضوں کی شرحِ سود 6 فیصد سے کم ہونا ضروری ہے۔ 37 فیصد ایجنٹس کے خیال میں شرحِ سود 5.5 فیصد سے نیچے آنی چاہیے۔ بلند شرحِ سود کے اثرات پہلے ہی ہاؤسنگ سرگرمیوں پر دکھائی دے رہے ہیں۔ سروے میں شامل دو تہائی ایجنٹس نے بتایا کہ خریدار گھر کی تلاش روک رہے ہیں یا اسے مؤخر کر رہے ہیں۔ فروخت کنندگان بھی انتظار کر رہے ہیں۔ 39 فیصد ایجنٹس کے مطابق ممکنہ فروخت کنندگان نے اپنے گھر فروخت کے لیے پیش کرنے کا منصوبہ ملتوی کر دیا ہے۔

مارکیٹ کی سست روی کے باعث بعض فروخت کنندگان قیمت اور شرائط میں نرمی دکھا رہے ہیں۔ 35 فیصد ایجنٹس نے بتایا کہ فروخت کنندگان اپنی مطلوبہ قیمت کم کر رہے ہیں، جبکہ 34 فیصد کے مطابق وہ خریداروں کو راغب کرنے کے لیے اضافی رعایتیں بھی دے رہے ہیں۔

قیمتوں کے بارے میں توقعات بھی کمزور ہو رہی ہیں۔ اگر رہن قرضوں کی شرحِ سود اگلے سال بھی تقریباً 7 فیصد رہی تو سروے میں شامل تقریباً 60 فیصد ایجنٹس کو گھروں کی قیمتوں میں کمی کا امکان ہے۔ لگ بھگ 33 فیصد ایجنٹس نے قیمتوں میں 5 فیصد سے زیادہ کمی کی توقع ظاہر کی۔

ریئل ریمیکس گروپ کے چیئرمین اور چیف ایگزیکٹو تمیر پولیگ نے سروے کے نتائج کے ساتھ جاری بیان میں کہا ہے کہ ’’رہن قرضوں کی بلند شرحِ سود پہلے ہی مشکلات سے دوچار ہاؤسنگ مارکیٹ پر مزید دباؤ ڈال رہی ہے۔‘‘

پولیگ کے مطابق خریداروں کو اب مذاکرات میں زیادہ برتری حاصل ہے، تاہم گھروں کی قیمتوں تک رسائی اور ادائیگی کی استطاعت اب بھی بڑی رکاوٹ ہے، جس کے باعث بہت سے افراد گھر کی تلاش مؤخر کر رہے ہیں۔ انہوں نے کہا کہ ہاؤسنگ سرگرمیوں کی پائیدار بحالی کا انحصار رہن قرضوں کی شرحِ سود میں بامعنی کمی پر ہوگا۔

سروے کے نتائج گولڈمین سیکس کی 2027 کے لیے امریکی ہاؤسنگ مارکیٹ کی پیش گوئی سے بھی مطابقت رکھتے ہیں۔ ادارے کے ماہرینِ معاشیات کو موجودہ گھروں کی فروخت اور نئے گھروں کی تعمیر میں کمی کا امکان ہے۔ ان کے اندازے کے مطابق اگلے سال موجودہ گھروں کی فروخت 3.9 ملین رہ سکتی ہے، جبکہ قیمتوں میں معمولی، یعنی 0.8 فیصد اضافہ متوقع ہے۔

گولڈمین سیکس کے ماہرینِ معاشیات رونی واکر اور ڈیوڈ میرکل کے مطابق جن گھر مالکان نے 2020 اور 2021 میں کم شرحِ سود پر اپنے رہن قرضوں کی نئی شرائط طے کی تھیں، انہیں موجودہ بلند شرحوں کے ماحول میں گھر منتقل ہونے پر نمایاں مالی لاگت کا سامنا ہو سکتا ہے۔