عالمی ریئل اسٹیٹ خبریں

سٹاک ہوم | ری نیوز انٹرنیشنل ڈیسک نیوز
سویڈن کی بڑی تعمیراتی کمپنی سکانسکا نے امریکا میں چار نئے ڈیٹا سینٹرز کی تعمیر کیلئے 1.2 ارب ڈالر کا بڑا ٹھیکہ حاصل کر لیا ہے، جس سے امریکی ڈیجیٹل انفراسٹرکچر مارکیٹ میں کمپنی کی سرگرمیوں میں مزید اضافہ ہوگا۔
سکانسکا کے مطابق یہ معاہدہ کمپنی کے ایک موجودہ کلائنٹ کے ساتھ کیا گیا ہے اور اس کی مالیت تقریباً 11.2 ارب سویڈش کرونا ہے۔ معاہدے کی پوری رقم سکانسکا کی امریکا میں 2026 کی تیسری سہ ماہی کی آرڈر بکنگ میں شامل کی جائے گی۔
منصوبے کے تحت چار ڈیٹا سینٹرز تعمیر کئے جائیں گے جن کا مجموعی رقبہ تقریباً 75 ہزار مربع میٹر یعنی 8 لاکھ 8 ہزار مربع فٹ ہوگا۔
کمپنی کے کام میں ڈیٹا سینٹرز کی مرکزی عمارتوں کی تعمیر کے ساتھ اندرونی حصوں کی تیاری بھی شامل ہوگی۔ اس میں تکنیکی نظام کیلئے مخصوص جگہوں، معاون حصوں اور دفتری سہولیات کی تعمیر اور اندرونی کام شامل ہیں۔
منصوبوں پر تعمیراتی کام 2026 کی تیسری سہ ماہی میں شروع کرنے کا شیڈول ہے جبکہ چاروں ڈیٹا سینٹرز کو 2028 کی تیسری سہ ماہی تک مکمل کرنے کا ہدف مقرر کیا گیا ہے۔
سکانسکا نے فی الحال اپنے کلائنٹ کا نام اور چاروں ڈیٹا سینٹرز کے درست مقامات ظاہر نہیں کئے۔ کمپنی نے صرف یہ بتایا ہے کہ یہ منصوبے امریکا کے جنوب مشرقی حصے میں تعمیر کئے جائیں گے۔
یہ معاہدہ امریکا کے ڈیٹا سینٹر شعبے میں سکانسکا کی بڑھتی ہوئی سرگرمیوں کا ایک اور بڑا منصوبہ ہے۔ کمپنی 2026 کے دوران اس سے قبل بھی امریکا میں متعدد ڈیٹا سینٹر منصوبوں کے ٹھیکے حاصل کر چکی ہے، جن میں ریاست جارجیا میں 7 کروڑ 50 لاکھ ڈالر کا ڈیٹا سینٹر اور امریکا میں 19 کروڑ 10 لاکھ ڈالر کا ایک اور منصوبہ شامل ہے، جبکہ ورجینیا میں بھی کمپنی ڈیٹا سینٹرز پر کام کر رہی ہے۔
امریکا میں ڈیٹا سینٹرز کی تعمیر میں تیزی کی بڑی وجہ کلاؤڈ کمپیوٹنگ، مصنوعی ذہانت اور بڑی مقدار میں ڈیجیٹل ڈیٹا استعمال کرنے والی خدمات کا پھیلاؤ ہے، جس کے باعث بڑے پیمانے پر نئے ڈیجیٹل انفراسٹرکچر کی ضرورت بڑھ رہی ہے۔
سکانسکا کیلئے 1.2 ارب ڈالر کا یہ معاہدہ نہ صرف اس کی امریکی آرڈر بک میں ایک اہم اضافہ ہے بلکہ امریکا کے تیزی سے بڑھتے ڈیٹا سینٹر تعمیراتی شعبے میں کمپنی کی پوزیشن کو بھی مزید مضبوط کرتا ہے۔

امریکا کی ہاؤسنگ مارکیٹ کی پائیدار بحالی کا انحصار رہن قرضوں کی شرحِ سود میں کمی پر ہوگا۔ رئیل اسٹیٹ ایجنٹس کے ایک سروے کے مطابق بلند قرضہ جاتی اخراجات خریداروں اور فروخت کنندگان، دونوں کی سرگرمیوں کو متاثر کر رہے ہیں۔

رئیل ریمیکس گروپ کا ایجنٹ آپٹیمزم انڈیکس، جو صفر سے 100 کے پیمانے پر ایجنٹس کے آئندہ 12 ماہ کے بارے میں اعتماد کو جانچتا ہے، ستمبر میں کم ہو کر 45.8 رہ گیا، جبکہ اگست میں یہ 54.3 تھا۔ انڈیکس میں کمی سے ظاہر ہوتا ہے کہ ایجنٹس کو تشویش ہے کہ رہن قرضوں کی بلند شرحِ سود مزید خریداروں کو مارکیٹ میں آنے سے روکے گی۔

ادارے کے حالیہ ماہانہ سروے میں 177 ایجنٹس میں سے 65 فیصد نے کہا کہ خریداروں کی طلب میں نمایاں اضافے کے لیے 30 سالہ رہن قرضوں کی شرحِ سود 6 فیصد سے کم ہونا ضروری ہے۔ 37 فیصد ایجنٹس کے خیال میں شرحِ سود 5.5 فیصد سے نیچے آنی چاہیے۔ بلند شرحِ سود کے اثرات پہلے ہی ہاؤسنگ سرگرمیوں پر دکھائی دے رہے ہیں۔ سروے میں شامل دو تہائی ایجنٹس نے بتایا کہ خریدار گھر کی تلاش روک رہے ہیں یا اسے مؤخر کر رہے ہیں۔ فروخت کنندگان بھی انتظار کر رہے ہیں۔ 39 فیصد ایجنٹس کے مطابق ممکنہ فروخت کنندگان نے اپنے گھر فروخت کے لیے پیش کرنے کا منصوبہ ملتوی کر دیا ہے۔

مارکیٹ کی سست روی کے باعث بعض فروخت کنندگان قیمت اور شرائط میں نرمی دکھا رہے ہیں۔ 35 فیصد ایجنٹس نے بتایا کہ فروخت کنندگان اپنی مطلوبہ قیمت کم کر رہے ہیں، جبکہ 34 فیصد کے مطابق وہ خریداروں کو راغب کرنے کے لیے اضافی رعایتیں بھی دے رہے ہیں۔

قیمتوں کے بارے میں توقعات بھی کمزور ہو رہی ہیں۔ اگر رہن قرضوں کی شرحِ سود اگلے سال بھی تقریباً 7 فیصد رہی تو سروے میں شامل تقریباً 60 فیصد ایجنٹس کو گھروں کی قیمتوں میں کمی کا امکان ہے۔ لگ بھگ 33 فیصد ایجنٹس نے قیمتوں میں 5 فیصد سے زیادہ کمی کی توقع ظاہر کی۔

ریئل ریمیکس گروپ کے چیئرمین اور چیف ایگزیکٹو تمیر پولیگ نے سروے کے نتائج کے ساتھ جاری بیان میں کہا ہے کہ ’’رہن قرضوں کی بلند شرحِ سود پہلے ہی مشکلات سے دوچار ہاؤسنگ مارکیٹ پر مزید دباؤ ڈال رہی ہے۔‘‘

پولیگ کے مطابق خریداروں کو اب مذاکرات میں زیادہ برتری حاصل ہے، تاہم گھروں کی قیمتوں تک رسائی اور ادائیگی کی استطاعت اب بھی بڑی رکاوٹ ہے، جس کے باعث بہت سے افراد گھر کی تلاش مؤخر کر رہے ہیں۔ انہوں نے کہا کہ ہاؤسنگ سرگرمیوں کی پائیدار بحالی کا انحصار رہن قرضوں کی شرحِ سود میں بامعنی کمی پر ہوگا۔

سروے کے نتائج گولڈمین سیکس کی 2027 کے لیے امریکی ہاؤسنگ مارکیٹ کی پیش گوئی سے بھی مطابقت رکھتے ہیں۔ ادارے کے ماہرینِ معاشیات کو موجودہ گھروں کی فروخت اور نئے گھروں کی تعمیر میں کمی کا امکان ہے۔ ان کے اندازے کے مطابق اگلے سال موجودہ گھروں کی فروخت 3.9 ملین رہ سکتی ہے، جبکہ قیمتوں میں معمولی، یعنی 0.8 فیصد اضافہ متوقع ہے۔

گولڈمین سیکس کے ماہرینِ معاشیات رونی واکر اور ڈیوڈ میرکل کے مطابق جن گھر مالکان نے 2020 اور 2021 میں کم شرحِ سود پر اپنے رہن قرضوں کی نئی شرائط طے کی تھیں، انہیں موجودہ بلند شرحوں کے ماحول میں گھر منتقل ہونے پر نمایاں مالی لاگت کا سامنا ہو سکتا ہے۔